「天弓故事」

 

中環出更:開工作坊幫失業人士 黃偉傑冀帶來不同故事

 

疫情衝擊經濟市道,面對生計問題嘅市民有增無減。有機構近日發起一個名為「天弓故事」嘅計劃,向有需要嘅市民提供工作坊以一展謀生技能。有份構思計劃嘅天乙慈愛基金會創會會長黃偉傑,本來係打算租一個約百呎嘅舖位,畀失業人士賣魚蛋幫補生計,但機緣巧合認識一位好有心嘅業主,於是就促成呢個計劃。

 

黃偉傑又話,呢個計劃為期一年,參加者只需要畀象徵式嘅行政費,就可以喺荔枝角某處所租用一個小單位。(OK688商場已配合這計劃租予單位給創業者)佢提到,參加計劃嘅人各有不同背景,可以話每一個工作坊背後都有自己嘅故事,雖然首階段只提供約40個名額,但就吸引逾百宗申請,以致候補名單上都有唔少人等緊,而黃亦會根據申請人過往嘅經歷挑選入圍名單,希望將唔同故事帶畀大家。佢又話,希望未來可以將計劃拓展至其他地區,幫到更多有需要嘅人。

鍾采霖(左)、黃偉傑(中)同周敏儀(右)都希望呢個計劃幫到有需要人士。(溫國佳攝)

今年初結婚嘅何生(左)及何太(右)過去一直任職航空界。

社企「絲打同行」兩位董事周敏儀(Vivian)同鍾采霖(Vince)都有份發起今次計劃。Vivian指過去唔少失業人士都會去市集擺檔做小買賣又或者藉一門手藝嚟賺取生計,但依家好多市集都礙於疫情而無開,所以都希望呢個計劃可以幫到一班小檔主。

 

大學生藉計劃推廣藝術

 

有份參與計劃嘅何氏夫婦原任職航空界,惟今年年初兩人舉行婚禮不久,航機班次因疫情而大減,繼而兩人先後遇上裁員潮。由於何太早前趁空閒鑽研結婚花環嘅製作知識同技巧,無咗份工之後就決定參加呢個計劃,打算成立以婚禮為主題嘅花藝工作坊。

 

同場仲有正喺大學攻讀視覺藝術嘅同學仔,佢哋仲喺自己嘅工作坊畫咗好靚嘅壁畫添。依家讀緊4年級嘅蔡同學就話,自己希望可以開一間畫室教青少年畫畫同藝術知識,又希望藉住參與計劃可以幫助喺社區推廣藝術。

 

卓妮

source: orientaldaily.on.cc

開設畫室嘅蔡同學(左)同曹同學(右)就喺工作坊畫咗幅好靚嘅壁畫。

Copyright   OK688   All rights reserved.